மகாவித்வான் ச. தண்டபாணி தேசிகர்

மகாவித்வான் ச. தண்டபாணி தேசிகர் (02.04.1903 – 25.04.1990)

சிதம்பரத்தில் சடையப்ப தேசிகருக்கும் பாலம்மாள் அவர்களுக்கும் மகனாகப் பிறந்தவர்.  சிதம்பரம் மீனாட்சி கல்லூரியில் பயின்றவர். அப்போது அங்கு ஆசிரியராக இருந்த தமிழ்த் தாத்தா உ.வே.சா அவர்களிடம் தமிழ் பயின்றவர்.  சென்னைப் பல்கலைக்கழகத்தில்  1928 இல் வித்துவான் பட்டம் பெற்றவர். மாநிலத்திலேயே முதல் மாணவராகத் தேர்ச்சி பெற்றவர். 

திருவாரூர் உயர்நிலைப் பள்ளி,  மீனாட்சிக் கல்லூரி,  திருப்பனந்தாள் செந்தமிழ்க் கல்லூரி,  மதுரை ஆதீனக் கல்லூரி,  அண்ணாமலைப் பல்கலைக்கழகம், மதுரைப்  பல்கலைக் கழகம் ஆகியவற்றில் பணியாற்றியவர்.  திருவாரூர் உயர்நிலைப் பள்ளியில் இவர் பணியாற்றும்போது முத்தமிழ் அறிஞர் டாக்டர் கலைஞர் அவர்கள் இவருடைய மாணவர்.  அண்ணாமலைப் பல்கலைக்கழகத்  தமிழ்த்துறைத் தலைவராகப் பணியாற்றும்போது (1954 – 1972) திருக்குறள் உரைவளம் கண்டார்.  மதுரைப் பல்கலைக்கழகத்தில் பணியாற்றும் போது (1983 – 1988) அவை அச்சிடப்பட்டது. பின்னர் மதுரைப் பல்கலைக்கழகம் அவற்றைத் தொகுதி தொகுதியாக வெளியிட்டது. 

திருக்குறள் அமைப்பும் அழகும்,  திருக்குறள் உரைவளம்,  திருவாசகப் பேரொளி மற்றும் விளக்க உரை (பேருரை), சைவத்தின் மறுமலர்ச்சி என ஆழமாக நூல் எழுதிய பெருமகனார். 

தமிழக அரசு 16.01.1988 இல் திருவள்ளுவர் விருதினை வழங்கிச் சிறப்பித்தது.  தமிழ்ப் பல்கலைக்கழகம் முதுமுனைவர் (D.Lit) பட்டம் வழங்கிப் போற்றியது.  மதுரை காமராசர் பல்கலைக்கழகம் பேராயச் செம்மல் எனும் விருதினை 1985 ஆம் ஆண்டு வழங்கியது.  இந்திய ஒன்றிய அரசு இவருக்கு “பத்மபூஷன்”  எனும் உயரிய விருதினை அளித்துப் போற்றியது. 150  நூல்கள் எழுதினார் என அறிஞர்கள் குறிப்பிடுகின்றனர்.